Euskararen Eguneko Adierazpena

Gaur, abenduaren 3a, Euskararen Nazioarteko eguna dugu eta horren harira honako adierazpena onartu zuen udalbatzak aho batez.

Bide berriak, modu berriak, Ongi etorri etorkizunera!


Jauzika dator euskara. Jauzika mendez mende. Jauzika egunez egun. Bihotzetik bihotzera jauzika. Eta, batez ere, ezpainez ezpain jauzika.


Bere eguna du abenduaren 3an euskarak, Nazioarteko Eguna hain zuzen ere. Baina ongi asko dakigu euskal herritarrok eta euskal hiztunok gaur ospatzen duguna ez dela egunaren mugetara errenditzen. Jauzi egiten du euskarak egunaren mugez gaindi ere. Jauzi egiten du euskarak muga guztiez gaindi, gure ahoan bizi-bizi, gure belarrietan zernahitarako prest beti. Noranahiko euskara gurea, denona.


Zer genuke, bestela, abenduaren 3an ospatzeko?


Bide luzea egina du euskarak, eta harekin batera euskal hiztunok eta euskaltzaleok, etorkizuna irabazteko etengabeko ahaleginean. Bide luzea du egina euskal gizarteak euskara plaza guztietara duintasun osoz eramateko. Eta asko lortu da. Jardunak berak erakutsi digu, erakusten digu egunero, ezinbestekoa dela bide horiek, gauzak egiteko moduak, etengabe eguneratzea, eraberritzea, irudimenez biziagotzea. Eta argi erakusten ari gara euskalgintzan ari garen guztiok prest gaudela, eta gogotsu, irakaspena barneratzeko eta praktikan mamitzeko.


Jarduerak adostu ditugu. Diagnostikoak hurbildu ditugu. Ekimenak josi ditugu elkarrekin. Elkarrekin ebaluatu dugu egindakoa. Elkarrekin hobetuko dugu hobetu beharrekoa. Eta gizarteak erantzun sendoa eman du, onetsiz euskararen erabilera era iraunkor eta argian handiagotzeko estrategia eta molde berriak. Badugu, bai, zer ospaturik aurtengo Euskararen Nazioarteko Egun honetan ere.

 

Ezagutzen ez genuen modu batean aktibatu zituen iazko gizarte-ariketa arrakastatsuak euskal hiztunak, neurri batekoak nahiz bestekoak. Aktibatu zituen, baita ere, herri aginteak eta askotariko gizarte-erakundeak, ikuspegi berri batetik. Eta, batez ere, estrategiak eta diskurtsoak eraberritzeko joera eta prestasuna aktibatu zituen.


Aldekotasuna, horrela, konpromiso eragingarri eta praktiko bihurtzeko bidean jarri zen.


Badator, hurbileko ostertzean, ekimen haren jarraipena. Euskaraldia berraktibatuko dugu, berriz ere denon arteko adostasun eta lankidetzan, eta hurrengo urteko Euskararen Nazioarteko Egunak izango du, ezinbestez, toki propioa ariketa sozial erraldoi horren ingurumarian.


Ez da, baina, horretara mugatzen euskararen erabilera areagotzeko eginahala. Ezin inola ere horretara mugatu. Alorrez alor landu beharra dago erabileraren landarea, sendo haz dadin. Ugari dira berariazko lanketa eskatzen duten alorrak, eta horien guztien artean bada bat gizarte-bizitzaren gune-gunean dagoena: ekonomia, lana eta kontsumoa biltzen dituen arloa, hain zuzen ere, gizartearen eta herritarron bizitzaren motore nagusia baita.


Arlo sozioekonomikoak eta euskararen erabilerak elkarri egin behar dioten ekarriaren garrantzia ez da gutariko inorentzat ezezaguna. Bai baitakigu ez dela hizkuntza normalkuntzarik lanaren, ekonomiaren eta kontsumoaren munduan erro sakonik ez duenik. Sendoak dira, alor horretan ere, eragile nagusiak egiten ari diren urratsak. Eta horietan lehena, zalantzarik gabe, euskararen erabilera askotariko erakundeen izaeraren ezaugarrien artean txertatzea dago.


Bide berriak, modu berriak, arlo sozioekonomikoan ere.


Estrategia berriak, beraz. Konpromiso berriak. Konpromisoari erantzuteko molde berriak. Praktika berriak.
Azken batean, aldekotasun eraldatzailea da gure gizartea, euskal hiztunok eta euskaltzaleok aktibatuz, bideratzen ari dena.

Udalok ere badugu zer egina eta konpromiso zehatzak hartzea dagokigu. Hori horrela, Zaldibiako Udal erakunde honek, honako konpromisoak hartzen dituela adierazten du 2019ko Euskararen Nazioarteko Egunaren atarian:

Zaldibiako Udalak:

1. Lehentasunez erabiliko du euskara, bere jakinarazpen eta gainerako erakunde, hornitzaile zein elkarteekiko harremanetan.
2. Administrazio publikoen kontratazioetan ziurtagiriak eskatu eta baloratuko ditu.
3. UEMA babestu, indartu eta zabaltzen lagunduko du.
4. Hitzarmenak sustatuko ditu euskarazko tokiko komunikabideen jasangarritasun ekonomikoa eta egonkortasuna bermatzeko.
5. Euskararen erabilera eta presentzia bermatuko du erabiltzen dituen komunikabide guztietan.
6. Gazteentzako euskarazko aisialdi zerbitzuak sustatu eta zabalduko ditu.
7. Familia eremuetan euskararen erabilera eta transmisioa sustatuko du.
8. Migratzaileentzako laguntza ildoak aktibatzen jarraituko du, euskara ikasteko eta euskal kulturara hurbiltzeko aukera izan dezaten.
9. Enpresetan euskararen erabilera normalizatzeko ekimenak sustatuko du, euskara laneko eta zerbitzuetako hizkuntza izan dadin.
10. Herriko gizarte eragile eta euskalgintzarekin batera elkarlanari eutsiko dio.

Zaldibian, azaroaren 21ean
Udalbatzak aho batez onartutako adierazpena