Asteartean irekiko da Luberriko kirol areto berritua
Asteartean bertan, saio txiki bat egingo da 17:00etan, makinen erabilera eta arautegia azalduz. Zerbitzuan izena eman nahi dutenek Karreane kultur etxean dute horretarako aukera. Bono motak, ordutegia eta informazio gehiago, jarraian.
Zaldibiako Udalak Luberriko kirol aretoa berritu du; kardio makinak eta indar makina gidatuak jarri ditu eta luzatze eta errekuperazio gunea egokitu. Hala, martxoaren 18tik aurrera, bazkideek norbere kabuz kirola egiteko aukera izango dute bertan.
Zerbitzua erabiltzeko hiru bono mota daude eskuragarri:
- Hiruhileko bonoa: 25 € . Ordainketa bakarrean ordaindu behar da.
- Seihileko bonoa: 40 €. Ordainketa bakarrean edo bitan.
- Urteko bonoa: 70€. Ordainketa bakarrean, bitan edo lautan (hiru hilabetero)
Pentsiodunek eta 25 urtez azpiko ikasleek %50eko hobaria izango dute.
Izena-eman nahi duten herritarrek albistearen beheko aldean eskuragarri dituzte izen-emate orria eta kirol aretoaren arautegia. Horiek irakurri eta sinatuta entregatu behar dira Karreane Kultur Etxean, eta erabiltzaile izateko eskaera egin ondoren, kirol aretora sartzeko giltza elektronikoa emango zaio erabiltzaile bakoitzari. Aurrez giltza elektronikoa dutenei, berriz, bertan aktibatuko zaie kirol aretoko baimena. Ordainketak banketxeko kontu korrontetik bideratuko dira, erabiltzaile bakoitzak aukeratutako maiztasunarekin.
KIROL ARETOKO ORDUTEGIA
- Astelehenetik ostiralera: 08:00etatik 21:00etara. Dena dela, asteazkenetan, 19:00etatik 20:15era aretoa itxita egongo da.
- Larunbat, igande eta jai egunetan: 09:00etatik 21:00etara.
- Abuztuan: 09:00etatik 21:00etara. 15 egunez itxita egongo da garbiketa sakona egiteko
