Ez-Ohiko Bilkurako kronika

Pasa den astean, asteazkenarekin, Ez-Ohiko Osoko Bilkura burutu zuen udalbatzak. Bertan erabakitakoen kronika duzu hemen. 

BILERAKO DEIALDIA

MOTA: EZ-OHIKOA

ORGANUA: Udal batzarra

EGUNA: 2021/11/24

ORDUA: 19:00etan

LEKUA: UDALETXEKO BATZAR ARETOAN  

 

AZTERGAIAK:

  1. 2021eko urriaren 27an  egindako bileraren aktaren irakurketa eta bere kasuan, onespena
  2. Azaroak 25, Emakumeen* kontrako indarkeriaren aurkako Nazioarteko Eguneko Adierazpen Instituzionala onartzea, hala badagokio.
  3. Interes Publiko Goreneko Proiektuen erregulazio berriari buruzko mozioa onartzea, hala badagokio, Zaldibiako EHBilduk aurkeztua
  4. Jaso nahiko genukeena eskaintzea – Migraziorako Euskal Itun Sozialaren mozioa onartzea, hala badagokio, Zaldibiako EAJ-PNVk aurkeztua
  5. Abenduak 3, Euskararen Nazioarteko Eguna, Adierazpen Instituzionala onartzea, hala badagokio.

 

Aurreko bilkurako akta aho batez onartuz eman zitzaion hasiera bilkurari. Jarraian, Azaroaren 25aren harira urtero legez, Adierazpen Instituzionala onartzeko proposamena zegoen mahai gainean. Ez zen adostasunik lortu, ordea, eta beraz, gehiengoz EHBilduko ordezkarien aldeko bozkekin eta EAJ-PNVkoen aurkakoarekin onartu zen Udal Adierazpena.

3. puntuan, EHBilduk aurkeztutako Interes Publiko Goreneko Proiektuen erregulazio berriari buruzko mozioa onartu zen, hau ere EAJ-PNVko ordezkarien aurkako bozkez. Eusko Legebiltzarra izapidetzen ari den lege aldaketa baten baitan, EHBilduren iritziz "Eusko Jaurlaritzari ahalmena ematen zaio ustezko ingurumen-hobekuntza izan dezakeen edozein azpiegitura Interes Publiko Goreneko Proiektu izendatzeko. (...) eta herritarren parte-hartzearekin eginiko udalen Hiri Antolamenduko Plan Orokorrei inposatu egingo zaizkie, balizko interes orokorreko proiektu horiek toki-eremuko administrazio publikoen irizpidearen aurkakoak izan arren. 

EAJ-PNVko ordezkariek beren kontrakotasuna adierazi zuten eta hala, EHBilduko ordezkarien aldeko bozkak eta EAJ-PNVkoen kontrakoak kontuan izanda, honakoa onartu zuen Udalbatzaren gehiengoak:

  1. Zaldibiako Udalaren Osoko Bilkurak adierazten du Lurralde Antolamenduari buruzko Legeak Interes Publiko Goreneko Proiektuen figura jasotzearen aurka dagoela, eta baita ere, gure udalen toki-autonomiarentzat kaltegarria den eta gure toki-demokrazia urratzen duen beste edozein tresnaren aurka dagoela.
  2. Zaldibiako Udaleko Osoko Bilkurak EUDEL Euskadiko Udalen Elkarteari eskatzen dio, udalen udal-interesa defendatzeko, jendaurrean adieraz dezala aurka dagoela eta dagozkion kudeaketa guztiak egin ditzala Lurralde Antolamenduari buruzko Legea aurreko puntuan deskribatutako moduan alda ez dadin.
  3. Zaldibiako Udalaren Osoko Bilkurak mozio honen edukia Eusko Legebiltzarrera eta EUDEL Euskal Udalen Elkartera bidaltzea erabaki du.

 

4. puntuari dagokionez, EAJ-PNVk aurkeztutako mozioa izan zen hizpide, Jaso nahiko genukeena eskaintzea – Migraziorako Euskal Itun Sozialaren mozioa deiturikoa. Kasu honetan, ez zen onartua izan. EHBilduko ordezkariek mozioari atxikitzeko hiru puntu proposatu zituzten, baina ordezkari jeltzaleek hiru puntuok bere egin ez zituztenez, mozioak ez zuen aurrera egin. 

 

Azken puntuan, aho batez, Abenduaren 3a, Euskararen Nazioarteko Eguneko Adierazpen Instituzionala onartu zen.

 

Euskara lanabes, aro berrirantz

Erabilera-eremu berri eta ez formaletan ere, euskarak arnas berri

Tentuz, baina ateratzen ari gara, azkenean, beltzenetik argira. Berreskuratzen hasi gara gutariko bakoitzaren eta elkarrekin osatzen dugun herriaren eta gizartearen bizitza erakargarri ez ezik, jasangarri ere egiten duena: zuzeneko harremanak; elkartzeko ohiturak, aukerak eta guneak; osatzen gaituzten besteengana biltzeko joera. Eta, horrekin batera, ezinbestekoa dugun jarduera ekonomikoaren hari eta sareak berriz ere indartzen ari gara, pandemiaren aurretiko tokira eta, inola ere ahal balitz, hobera iristeko itxaropenez.

Eta erabaki sendo bat dugu gidari: ez dadila funtsezkorik ezer atzean geratu.

Ezta euskara ere. Inola ere ez.

Gurekin batera egin dio euskarak pandemiari aurre, eta gurekin irten behar du garaile. Izan ere, aro berrian, gure eta geure gizartearen zaurgarritasunaren jakitun egin gaituen egoera larriaren ondoren, harreman eta komunikazio molde, ohitura eta bide berriak sortzen ari dira, eta are berriagoak eta harrigarriagoak sortuko dira aurrerantzean.

Pandemiak agerian utzi du jakin bagenekiena: zenbateraino diren ezinbestekoak komunikazio ildo eta sareak, zenbaterainoko balioa eransten dion komunikazioak gure zeinahi jarduerari; orain, jakiteaz gain, sentitu ere egiten dugu errealitate hori: sakon-sakoneraino barneratu dugu komunikazioaren, harremanaren funtsezkotasuna. Hori da aro berriaren ezaugarri nagusietariko bat. Eta hori bera du euskarak erronka: komunikazio eta jarduera eremu berrietan ere, naturaltasun osoz, dagokion tokia hartzea. Eraginkorki. Tinko.

Euskara, euskal hiztunon komunitatearen jarrera proaktiboari esker, IKTek hizkuntza gutxituen hedapena eta indartzerako ekarri duten erronka handiari aurre egiten ari zaio, komunikazio eta informazioaren teknologien sareetan. Badu tokirik. Baliagarria da. Eta zinez zaila du  hizkuntza ozeano erraldoian horrelakorik lortzea.

Eredugarria da alor horretan ere euskal hiztun komunitateak egin duen eta egiten ari den lana, besteak beste erabilerarekin zuzen-zuzenean loturiko presentzia delako euskarari benetako balio erantsia dakarkiona. Eta argi geratzen ari da erakunde publikook eskaini behar dugun ezinbesteko babes eta lidergotik, ekimen eta lankidetza publiko-pribatuaren eskutik lan egiten badugu, erronkaren neurriak ez gaituela beldurtu behar. Gai garela argiro erakusten ari garelako, adibidez hezkuntzaren munduan, hedabideenean, osasungintzarenean, eremu sozioekonomikoan, administrazioarenean eta beste hainbat eta hainbatetan urrats ausartak eman behar direla eta ematen ari garela euskal hiztunen eskubideen gauzapen errealean.

Eta horietan guztietan aurrera egin beharra dago, jakina, aurrerapauso sendoagoak emanez,  jarraikortasunez, etengabeko berrikuntzaren bidetik eta guztion konpromisotik. Baina pandemiaren osteko aro berriaren hasiera honek beste ikuspegi bat eranstea eskatzen digu: hizkuntzaren erabilera formalekin batera, eremu ez formaletakoa landu beharra dago, behar besteko lehentasunez. Euskal hiztunak naturaltasun osoz gauzatu behar du euskaraz bizitzeko aukera, eguneroko harremanetan eremu formaletik lan mundu, aisialdi, kultur edo kirol eremuetara igarotzean, hori bera baita, hain zuzen ere, euskaraz bizitzearen esanahietako bat. Ezin dizkiogulako euskarari ukatu gorputz eta espirituaren atseden eta gozamenari lotzen zaizkion eremu horiek. Eta hor aurrera egiteko, hiztunen konpromisoa ez ezik ezinbestekoa izango da instituziook egin behar dugun ahalegina: bitartekoak jarriz eta eredugarritasuna erakutsiz.

Euskararen bizi-indarra dugu jokoan, eremu formalez gainera, eremu ez formal horiek euskararentzat irabaztearen erronkan. Izan ere, alor horretan euskararen erabilerak jauzi bat egiteak errotik eta norabide zeharo positiboan aldatuko luke hiztun asko eta askorengan, oso bereziki gazteengan, euskararekiko bizipena.

Aisialdi eta kirolaren eremuek badituzte, bestalde, berezko ezaugarri baliotsuak hizkuntza erabiltzeko ohituren aldaketari dagokienez, eta askotariko antolakuntzarako joera dute (klubak, federazioak, elkarteak, taldeak…). Nekez bilatuko genuke esparru egokiagorik gazteengana iristeko, euskararen erabilera ez formalari berebiziko bulkada emateko, partaide gazte zein ez hain gazteengan euskararantz urrats eraginkorra egiteko gogoa aktibatuz. Horra, beraz, eginkizuna.

Aukera paregabea dugu normaltasun berri baterako bidearen hastapen honetan berreskuratzen ari garen eta asmatuko ditugun harreman eta erabilera-eremu berrietarako euskara, bidelagun ez ezik, lanabes eraginkor bilakatzeko. Guztion esku dago.

Euskara prest dugu; gure gizartea, gogotsu; gure herria, erabakia hartuta. Abia gaitezen.