Larunbatean, herrira etorri berriei ongi-etorria
Goizeko 11:00etan hasiko da Ongi-Etorria udaletxean. Azken hilabeteetan herrian erroldatu diren guztiak dira gonbidatuak, eta udalak eta herriko eragileek ongi-etorria egingo diete.
Ekimenaren jatorria:
2020an hasi ginen herrian erroldatu berrientzat Harrera Eguna antolatzen. Iaztik ekimen hau berpentsatu eta sakonago landu ondoren, Harrera Integralerako proiektua garatu dugu eta larunbatean izango du hurrengo pausoa, Ongi-Etorri saioarekin.
Ongi-Etorri saio honen helburua, herrira etorri berriei ongi-etorria emateaz gainera, herriko berri eman eta interesgarri izan dakieken informazioa eta harreman-bideak eskuragarri jartzea da. Baita, nola ez, elkar ezagutza sustatu eta herrian saretzeko aukera sortzea ere. Saioa prestatzeko kontuan izan dira erroldatzerako unean etorri berriek borondatez bete ahal izan dituzten galdetegiak, ahalik eta ongi-etorri pertsonalizatuena egin asmoz.
Izan ere, saio hau aurretik datorren bide bateko lehen geltokia izango da. Udal ordezkari, langile eta herriko eragileetako kideek formakuntza jaso dute aurrez aniztasunaren, migrazioen edota identitateen inguruan eta udalean harrerarako protokolo bat osatu da.
Ongi-etorri saio hau proba pilotua izango da eta bide-lagun izango ditugu Emun aholkularitzako teknikariak saioaren jarraipen eta balorazioa egiteko. Hasiera batean urtea 2 edo 3 ongi-etorri saio antolatzea aurreikusten da, balorazioen ondoren zehaztuko delarik maiztasun hau.
Egitaraua: MARTXOAK 25, LARUNBATA
11:00etan Udaletxe atarian elkartu eta Areto Nagusira igoko gara Ongi-Etorriari hasiera emateko
Ondoren, kalean agurra eta ibilaldia egingo dugu herri-guneko puntu ezberdinetara
12:15 aldera berriro plazan izango gara mokadutxo batekin amaiera emateko
Parte hartzaileak:
Azken hilabeteetan Zaldibira etorri diren herritarrak izango dira protagonistak eta herriko hainbat eragiletako ordezkarien eta udal ordezkarien ongi-etorria jasoko dute.
Gainontzeko herritarrek ere etortzeko aukera dute, hala nahi izanez gero.
