Maskara: bihartik aurrera zer?

Pasa den astean iragarri zuen Espainiar Estatuko gobernuak maskararen derrigorrezko erabileraren legea aldatzeko asmoa eta gaur argitaratu dute agerkari ofizialean araudi berria. Aire zabalean egon eta elkarrenganako 1,5 metroko distantzia betez gero, maskara kentzeko aukera irekitzen da horrela bihartik aurrera. Jarraian xehetasun guztiak. 

 

Gaur, ekainaren 25ean argitaratu denez, honakoak dira bihartik aurrera izango diren arauak maskara erabiltzeari dagokionez:

 

Sei urtetik gorako pertsonek maskara erabili beharko dute honako kasu hauetan:

  • Espazio itxi guztietan, bai erabilera publikoko lekuetan baita jendearentzat irekiak diren guztietan.
  • Aire zabaleko edozein espaziotan, pertsonen pilaketa dela eta, elkarren arteko gutxieneko distantzia 1,5 metrokoa izatea ezinezkoa denean. Etxe berean bizi diren pertsonen kasuan soilik egongo da salbuetsita maskara erabiltzea kasu hauetan. 
  • Aireko, itsasoko, autobuseko edo trenbideko garraiobideetan, bidaiarien nasak eta geltokiak barne, edo teleferikoan, bai eta garraio publikoetan eta pribatuetan ere, baldin eta turismo-ibilgailuetako bidaiariak ez badira etxe berean bizi.
  • Aire zabaleko ekitaldi jendetsuetan, bertaratutakoak zutik daudenean edo eserita daudenean, baina pertsonen arteko 1,5 metroko distantzia mantendu ezin denean. Salbuespena izango da kasu honetan ere etxe berean bizi diren pertsonak baldin badira.

Hau horrela izanik eta maskara erabiltzeko derrigortasuna ez duten salbuespenezko kasuak kontuan hartu gabe, orokorrean araudi berriak bide eman du aire zabalean eta 1,5 metroko distantzia bermatuz gero maskara ez erabiltzeko. Distantziak mantentzen ez badira edo espazio itxian bagaude derrigorrezkoa izaten jarraitzen du maskararen erabilerak momentuz.