Ohiko osoko bilkurako kronika

Pasa den ostegunean ospatu zuen Zaldibiako udalbatzak urriko ohiko osoko bilkura. Jarraian dituzue bertan landu zen gaitegia eta hartutako erabakiak.

Goiener Energia Kooperatiba:

Bilkurako lehen erabakia izan zen. Eztitxu Mujika Mariezkurrena alkateak azaldu zuenez, gaur egungo gizartearen erronka nagusienetakoa da larrialdi klimatikoari aurre egitea da eta txikitasunetik urratsak ematea dagokigu. Aurrez Ingurumen lan-arloan kontrastatuta, Zaldibiako Udala Goiener energia kooperatibako bazkide izatea onartu zuen udalbatzak aho batez. Era berean, Goienerri lehen azterketa bat egiteko esleipena ere onartu zen. Udal erainiketan eta azpiegituretan energia berriztagarria sortzeko aukerak ikertuko ditu irabazi asmorik gabeko kooperatibak datozen hilabeteetan.

Udal irudi berria:

Bigarren puntuan alkateak aitortu zuenez, bizi dugun egoeran herritarren kezka nagusia ez dela jakinagatik ere, udal eraikin berria errealitate bihurtuko da laster eta garai egokiena dela argudiatu zuen, udalaren irudi berria hautatzeko. Egungo irudiak armarriaren oinarriak ditu, koroa eta bi zaldiekin.  

Era berean, Eztitxu Mujikak aipatu du udazkenean zehar herri-komunitatea egiteko ekimenak burutzea adostu zela eta ildo horretan kokatuko dela prozesu hau ere, herritarren partaidetza zuzenez garatuta.

Prozesu hau hasteko eta bertan ateratzen den emaitza errespetatzeko erabakia hartu zuten aho batez udalbatzan elkartutako ordezkari guztiek eta prozesuaren jarraipena egingo duen mahaia osatuko duten partaideak adostu ziren.

Mahaia:

Alkatea: Eztitxu Mujika

EHBildu udal-taldearen ordezkaria: Jon Luloaga

EAJ-PNV udal-taldearen ordezkaria: Esti Jaka

Udal-langilea: Mikel Urteaga

Herri-Hezitzaileen taldeko herritarra: Ustaritz Ormaetxea

Komunikazio aditua: Gattiken taldeko Aritz

Egiari Zor Fundazioaren mozioa:

Udalean Egiari Zor Fundazioak erregistratutako mozioa izan zen gai zerrendako hurrengo gaia. Motibazio politikoko indarkeriaren testuinguruan giza eskubideen urraketak jasan dituzten biktimei laguntzeko, biktima horien erreparazioa eta aitorpena tramitatzeko deialdia eta laguntza eskaintzeko konpromisoa hartzea eskatzen zitzaion Udalari bertan.

Mozioa aho batez onartu zen eta hala, urraketa horiek jasan dituzten biktimak aitortzeaz gainera, Udalak herritarrei eskaerak jarri ditzaten dei egiteko eta horretan laguntzeko konpromisoa hartu du, baita erabaki horri publizitatea ematekoa ere.

2021 urterako Tasa eta Zergak

Egungo egoera dela medio, tasa eta zerga guztiak bere horretan uzteko proposamena egin da udal gobernutik, hondakinen bilketa eta tratamenduaren tasa izan ezik.

Kasu honetan igoera progresibo bat aplikatzeari ekin zitzaion iaz eta datorren urterako igoera berbera egiteko proposamena egin zuen alkateak. Adierazi zuen aurtengoan tratamendu kostua handitu egin dela erraustegiak jarri dituen prezioak direla eta.

Bestalde, industriako bilketa eta hondakinak izan ziren hizpide nagusi. Mutiloako zabortegia itxi eta hondakinak erraustegira eramaten direnetik, tratamendu kostua seikoiztu egin da eta beraz, industriako hondakinen tasa nabarmen igotzea proposatu du udal gobernuak, udalak horren kargarik hartu ez dezan.

Beraz, eta EHBilduko 6 ordezkarien aldeko bozkez eta EAJ-PNVren 2 ordezkarien abstentzioarekin honakoa onartu zen:

Hondakinen bilketa eta tratamendu tasa:

Galde erreguak:

Puntu honetan hainbat hitzartze egon ziren. Batetik, Mikel Luloaga EHBilduren ordezkariak pasa den asteburuan Ordizia eta Zaldibian izandako baheketaren emaitzak izan zituen hizpide. Zinegotziak azaldu zuen zein izan zen Udalak jaso zuen informazioa emaitzei dagokionez eta salatu zuen oinarrizko informazioa falta zela. Zenbat zaldibitarrek hartu zuten parte? Osasun Sailari datuak eskatzen jarraituko zutela adierazi zuen.

Bestetik, EAJ-PNV taldearen izenean Garbiñe Mendizabal zinegotziak hitza hartu zuen taldean adostutako testu bat irakurtzeko. Bertan datu babesaz eta Covid-19az kutsatutako herritarren hondakinen bilketaz eskaera batzuk egiten zitzaizkion Udalari.

• Mezuetan argi eta garbi zabaldu behar da ez dela nahitaezkoa Zaldibiako Udalera deitzea Covid 19an positibo ematen bada edo arrazoi horrengatik isolatuta badago, hori borondatezkoa baita.
• Jada ez deitzea erabakitzen duten herritarrak daudenez gero, eta honek herri-osasun arazoa sor dezakeenez gero. Ez deitzea erabakitzen duten herritarrentzat, herriko gune desberdinetan Errefusa edukiontziak jartzea.
• Eta informazio- eta prestakuntza-kanpaina bat egitea, Covid-19k edo isolamenduan daudenek eragindako hondakinak kudeatzeko moduari buruz.

Eskaera honen aurrean alkateak honako erantzunak eman zizkien:

• Udalak ez du inor derrigortzen Udalera deitzera, baina eskatu bai egiten du eta hala egiten jarraituko du. Bi arrazoi nagusirengatik: herritarrak beharrezko dituen zerbitzuak jasotzen dituela bermatzeko eta hala ez bada udalak dituen zerbitzuak martxan jartzeko; eta herriko argazki erreala izan dezan udalak, erabakiren bat hartu behar bada garaiz eta proportzioan hartzeko.
• Kutsatutako hondakinen protokoloa du udalak, publiko dena martxotik eta gobernuek emandako aginduak betetzen dituena. Protokolo honekin bermatzen dugu hondakinak agindu duten bezala biltzea (errefusa bezala) eta etxetik atera behar izan gabe eta inguruko inor arriskuan jarri gabe egitea (hondakinak etxeko atean jasoz behar bezala prestatuko udal langileen bitartez). Hondakin hauek ez dira bide publikoan geratzen, giltzaz itxitako lokal batean egoten dira Sasietak propio egiten duen bilketa iritsi arte. Horrekin saihesten dugu kalean zehar kutsatutako hondakinak egotea edonoren eskura eta herritarrak eta Sasietako langileak babestea.

Amaitzeko, Emagin taldeko kide batek parte hartu zuen bilkuran, bertan azaldu zuenez Udalak formakuntza prozesu bat hasiko duelako hemendik hasi eta datorren urte amaierara arte. Udal ordezkariek, langileek eta herriko eragileek jasoko dute formakuntza hau, datozen hilabeteetan garatuko dena.