Udako Jarduerak 2020: lehen bilera irekia

Alarma-egoeraren baitan gerturatzen ari da 2020ko uda eta berarekin, urtero Udalak antolatu ohi dituen Udako Jarduera kanpaina. Aurtengoa ez da ohi bezelakoa izango. Errealitate horretatik abiatuz, lehen bilera ireki bat antolatu dugu astelehenean, 15:30ean. Guraso Elkarteko kideen eta gaztetxoen familia batzuen asistentzia bermatuta, gaiarekiko interesa duen edonori irekita egongo da bileran parte hartzea. Jarraitu irakurtzen.

Dagoeneko errealitatea da aurtengo udako jarduerak ez direla orain artekoak bezalakoak izango. Jarduera hauek herriko txikienengan eta hauen familiengan duten eragina kontuan hartuta, baita begirale eta orokorrean herriari ekartzen diotena ikusirik, Udalak ez luke guztia bertan behera uztea nahi. Uztailean indarrean egongo diren legeek eta osasun-irizpideek baimentzen dutenaren baitan, antolakuntza txukunez eta gure herriak eskaintzen dizkigun aukerak baliatuz lanketa bat abiatu dugu eta horretaz ariko gara asteleheneko lehen bilera horretan. 

Ausa Gaztelu Guraso Elkartearekin eta  gaztetxoen familia batzuekin harremanetan jarri gara dagoeneko bilerarako. Hala ere, edonork parte hartu ahal izango du bertan.

EGUNA: ASTELEHENA, maiatzak 25 

ORDUA: 15:30ean

LEKUA: Bilera Telematikoa

Bileran parte hartu ahal izateko ondorengo pausoak jarraitu behar dituzue:

• Ordenagailu, mugikor edo tablet batetik Chrome edo Firefox bilatzailearen bidez ondorengo lotura ireki behar duzue: https://plaza.zaldibia.eus/b/ezt-nkv-hux
• Bertan sartzean:
  • Izen bat jartzea eskatuko dizue: jarri zuena eta eman HASI edo BATU botoia
• • Aukeratu mikrofonoa eta sakatu oihartzun frogan BAI
• Behealdean kamera baten irudia agertuko zaizu eta hau sakatuta baimena eman eta "iniciar compartir" sakatu.
• Arazoren bat duenak 943 88 03 57 Zaldibiako Udaleko telefonora deitu eta momentuan saiatuko gara arazoa konpontzen.